انا هرجع ، بقلم / محمد إبراهيم درويش
انا هرجع
بقلم / محمد إبراهيم درويش
انا بكره هحاول مبكيش
والليل ان ضلم ممشيش
والفرسه ان جاتلي راح اخطفها
وإن فلتت مني متجريش
وبكل ما فيا انا راح اعافر
وإن بعدت أحلامي انا هغامر
واحزاني هجبها واحلفها
لهتاخد دمعي وهتسافر
انا هرجع وابتدي م الاول
لو حتى المشوار هيطول
فوق كتفي حمولي هخففها
ومشاعري الزايفه هتتحول
وهجبلي مشاعر حقيقيه
متحسش بجراح غير فيا
وحكاوي الحب اللي اعرفها
هلغيها واقول ع الانانيه
انا هبدا واكتب من تاني
عن حاجه مجتش و نسياني
عن فرحه بشوفها وبعرفها
تختفي اذا كانت علشاني
انا لسا بسمي و هتوكل
لو هدفي بعيد مش هستعجل
والناس اللي حاولت اعرفها
راح تطلب تقابلني و اجل
انا هرجع ف الدنيا واحد تاني
افكارو اترسمت علشاني
م الدنيا بياخد اوصفها
علشان لا يقاسي ولا يعاني.
محمد إبراهيم درويش.
المنتدى العالمي للأدباء والكتاب العرب
تعليقات
إرسال تعليق