شيئ بيفلق الصخر شعر ؛ نذيردهان
((شي بيفلق الصخر))
((بدي ابق البحصه))
/////////
بدي احكيلكم يا عالم
وأفش خلقي
ع أهلي وناسي واصحابي
وكل خلقي
كلمه وحده بسمعها
دايما م الناس
ريتك دنيا من بعدي
لو تحترقي
////////
مثلأ جارك لو شافك
بحالة ضيق
بليلك تصرخ من المك
تفتكرو صديق
يدق بابك يقلك انصرعنا
ابني رح يفيق
سد بوزك قوام، اتألم
مو من حقي
/////////
وابنك مالك صرفتو
ت اتشبشب وصار
شب مشورب أسم الله
قيمه ومقدار
لو ردت تنصح جنابو
يقلك ختيار
عم بتخررف وبتحكي
شرقي غربي
////////
وبنتك لو بتقللا
هاتي لأشرب
متشردق،،،بكاسة مي الحقيني
تصير تتكهرب
مرتك تصرخ يازلمه
ريتك تضرب
ادعي عنك واقللا
ريت تحترقي
//////
دنيتنا صارت اش دنيا
الله يعين
يللا سيدي بسيطه
لابد رايحين
وبكره لما بنتلاقى
عند الموازين
بتاخد حقك ومنك
باخد حقي
////////
بدي انعي أيامنا
هللي مروا.
واللي شفناه بهالدنيا
بحلوه ومرو
اللي عانى لربو
يسلم امرو
تعي لعنا ياندابه
تيابك شقي
///////
ياحسره علينا اش كنا
واش صرنا ياناس
كنا جواهر بتضووي
متل الألماس
صرنا بحصات بالاجرين
عما بتنداس
م اللي بشوفو يا أعصابي
عم تحترقي
///
شعر ؛ نذيردهان
المنتدى العالمي للأدباء والكتاب العرب
تعليقات
إرسال تعليق